અમેરિકામાં ૧૯ જોખમી દેશોના નાગરિકોની ઇમિગ્રેશન ચકાસણી વધુ સખત
USCIS એ અફઘાન નાગરિક દ્વારા હુમલા બાદ સુરક્ષા માર્ગદર્શિકામાં કર્યો ફેરફાર
વૉશિંગ્ટન ડી.સી.: યુએસ સિટીઝનશિપ એન્ડ ઇમિગ્રેશન સર્વિસીસ (USCIS) એ તાજેતરમાં બહાર પાડેલી એક અખબારી યાદીમાં જણાવ્યું છે કે હવેથી ૧૯ ઉચ્ચ જોખમ ધરાવતા દેશોના નાગરિકોની ચકાસણી પ્રક્રિયામાં તેમના દેશ-વિશિષ્ટ નકારાત્મક પરિબળોને પણ પ્રાથમિકતા આપવામાં આવશે.
આ નિર્ણય વૉશિંગ્ટન, ડી.સી.માં એક અફઘાન રાષ્ટ્રીય દ્વારા નેશનલ ગાર્ડના બે જવાનો પર ગોળીબાર કરવાની ઘટનાના તુરંત બાદ લેવામાં આવ્યો છે.
નવી માર્ગદર્શિકા હેઠળ, અમેરિકામાં પ્રવેશ કે સ્થાયી થવા માંગતા આ દેશોના વિદેશી નાગરિકોના બેકગ્રાઉન્ડ ચેક વધુ સઘન બનાવવામાં આવશે. અત્રે ઉલ્લેખનીય છે કે, ભૂતકાળમાં ટ્રમ્પ પ્રશાસને અફઘાનિસ્તાનમાંથી શરણાર્થીઓના પુનર્વસન અને નાગરિકોના પ્રવેશ પર પ્રતિબંધો મૂક્યા હતા.
USCISનું આ પગલું યુએસની રાષ્ટ્રીય સુરક્ષા અને ઇમિગ્રેશન પ્રક્રિયાને વધુ મજબૂત કરવાના પ્રયાસ તરીકે જોવામાં આવી રહ્યું છે.
